【Emily】環保交通遊西貢 九巴96R線明日免費搭
[2023.03.25] 發表
【明報專訊】九巴近年為減低耗油量，自行研發喺巴士車頂安裝太陽能裝置，供電畀車廂嘅冷氣系統同乘客設施，目標今年內車隊嘅一半，即係2000架有相關裝置。九巴噚日宣布，為推廣計劃，聽日會舉辦免費乘車日，全港市民可以無限次免費乘搭來往鑽石山站同西貢黃石碼頭嘅假日郊遊路線96R，當日呢條線三對班次都會由車牌號碼「VG6020」嘅太陽能巴士行駛。九巴話希望畀乘客體驗綠色運輸，搭住環保巴士去西貢郊外呼吸清新空氣。
車頂裝太陽能裝置 慳油識降溫
九巴喺6年前開始自行研發太陽能裝置，𠵱家喺車頂嘅太陽能薄膜已經發展到第三代，當巴士停車熄匙、車廂溫度超過35℃，巴士就會用太陽能供電驅動通風系統，車廂溫度可以降低8至10℃。九巴估計每部巴士每日可以慳到5%至8%油量，相等於每年每輛巴士減少大約6噸碳排放。
更多港聞
相關新聞
