【Emily】助處理內地問題 民建聯人代擬搞聯合辦
[2023.01.02] 發表
【明報專訊】新一年大家都會訂立一啲新目標。噚日民建聯就舉行咗「匯聚人才 邁進新時代」啟動禮，主席李慧琼話希望未來一年做好六方面嘅工作，包括推動香港融入國家發展大局，加強對外聯繫講好香港、中國故事等，未來仲打算成立對外聯絡小組，有系統地規劃安排，結合推動大灣區同東盟嘅聯繫合作。民建聯喺上個月人大選舉中取得7席，佢哋亦正積極籌備聯合辦公室；李慧琼解釋話，其中一個工作係協助企業同市民處理內地嘅問題，所以有意搞聯合辦事處，仲話希望做到地辦，不過就仲研究緊。
噚日Emily見到新當選立法會議員尚海龍都有出席啟動禮，仲有份上台。事後Emily問番尚海龍，原來佢早兩年有參與民建聯嘅「政道」課程，當中只有三分之一人係社會各界人士，佢就係其中之一，當時修讀咗大約半年。咁民建聯又有冇向佢招手呢？佢就話不予評論喇，自己經商，都係想去學習吓。
更多港聞
相關新聞
