【Emily】IT狗導演：將有更多類似《正義迴廊》作品
[2022.12.26] 發表
【明報專訊】前財政司長曾俊華早排客串過ViuTV電視劇《IT狗》，佢噚日喺facebook話有日飲咖啡時撞到該劇導演簡君晉(Lawrence)，傾到𠵱家年輕人嘅價值觀已經唔同，除咗錢，仲要講價值、講理念，而呢一點，Lawrence話電影方面都有類似發展方向，年輕人睇戲唔係單純追求娛樂，而會傾向揀啲有共鳴、認同當中價值嘅電影去睇。
Lawrence話，近期一啲同家庭、移民相關嘅電影咁受歡迎，《正義迴廊》呢類觸及法治、公義嘅電影引起咁大迴響，都正好解釋年輕人嘅價值觀有變，佢相信未來仲會有好多類似《正義迴廊》嘅作品出現。曾俊華就以近期睇完嘅《阿凡達：水之道》為例，提到電影主角不惜用性命保護家人同家園，而「家人」唔一定係有血緣關係嘅人，如果大家有共同價值、有共同希望守護嘅事物，都可以係「家」嘅一分子。
更多港聞
相關新聞
