【Emily】陳茂波拉隊去工展 5國領事齊試食

工展會噚日起恢復現場試食，財政司長陳茂波（左三）邀請咗5個東盟國家駐港總領事一齊入場，除咗品嘗香港地道美食，仲喺廠商會長史立德（右三）陪同下，齊齊試飲東盟國家特色飲品。（政府新聞處）

【明報專訊】政府放寬防疫措施，工展會3年嚟第一次可以畀市民試飲試食，財政司長陳茂波噚日就邀請5個東盟國家駐港總領事到場參觀，包括菲律賓、印尼、越南、馬來西亞同泰國嘅駐港總領事，仲齊齊試食香港地道美食。陳茂波話過往兩年聽到市民意見，目前覺得喺風險可控下，希望盡量令市民參觀時「開心啲，全面啲」。

孫玉菡出關 參觀社企攤檔

早前確診新冠病毒嘅勞福局長孫玉菡亦康復出關，噚日同社署署長同康復專員去工展會，為有份參展嘅社企同社署資助嘅康復服務單位打氣。孫玉菡話參展嘅新生精神康復會、扶康會、基督教懷智服務處、匡智會，分別售賣香皂、木製工藝品、陶瓷、盆栽等，唔單止見到殘疾朋友嘅心意，亦達至創業展才能計劃目標，為殘疾人士提供就業機會。

孫玉菡仲話，出年社署會推行試驗計劃設立「職業康復進階訓練課程」，會優化庇護工場或者綜合職業康復服務中心嘅訓練模式，為殘疾人士提供更多元化嘅就業機會。佢又提到，社署嘅攤位由15間受資助社企同單位輪流參展，希望大家可以嚟維園多多支持咁話。