【Emily】病休後回法庭 蘇惠德半晝審逾40案
[2022.09.28] 發表
【明報專訊】《港區國安法》指定法官、總裁判官蘇惠德(圖)自舊年10月初起放病假，今年2月起復職，久未公開露面嘅佢噚日首次出庭，喺東區裁判法院一庭，於一個上晝就審理咗逾40宗案件。Emily見蘇官精神不俗、聲線清晰，相信佢呢段時間都休息充足。
蘇官去年8月起無再處理國安法案件，司法機構確認佢10月起放病假，有傳佢因病入院做換心手術。蘇官今年2月復職後，只出席過6月嘅年度資深大律師委任典禮，直至噚日出庭審案。
蘇官前年7月確認獲委任做國安法指定法官，處理過多宗國安法案件，包括47名民主派「35+初選案」案首次提堂，「馬拉松式」提訊做咗近14個鐘直至凌晨，但由舊年9月起，案件就由主任裁判官羅德泉接手。蘇官喺舊年8月26日審理放假前最後一宗案件，就係女文員及男學生涉派「港獨」傳單嘅國安法案件。
更多港聞
相關新聞
