【Emily】火化流產胎 「永愛堂」周一啟用

環境及生態局長謝展寰（前右二）噚日參觀位於葵涌嘅流產胎火化設施「永愛堂」，聽食環署人員講解。（政府新聞處圖片）

環境及生態局長謝展寰（左四）昨日為「永愛堂」主持開幕儀式。其他主禮嘉賓包括該局常任秘書長（食物）劉利群（左三）、副局長黃淑嫻（左二）和食環署長楊碧筠（右四）。（政府新聞處圖片）

【明報專訊】過往火化流產胎，只能經化學廢物處理中心或寵物火化設施處理，為父母帶嚟二次傷痛。位於葵涌嘅流產胎火化設施「永愛堂」下星期一(26日)啟用，環境及生態局噚日喺facebook發帖，話永愛堂標誌咗流產胎整全安排嘅重要里程碑，局長謝展寰同副局長黃淑嫻噚日主持開幕儀式，形容永愛堂環境優美寧謐，方便易達。

按父母心聲命名 骨灰撒紀念花園

環境局話「永愛堂」(Home of Forever Love)名稱係聆聽咗流產胎父母嘅心聲而定出。局方又話，正如前食衛局長喺首個「永愛園」(流產胎安放設施)啟用時講過，有關名稱象徵父母、政府及社會對逝者永遠嘅關懷同愛護。

永愛堂內有兩個小型火化裝置，並設有接待處、悼念活動室、供撒放流產胎骨灰嘅專用紀念花園，以及4個可供悼念嘅電子屏幕。火化設施除咗畀流產胎嘅父母申請外，其他本地公私營醫院及其他醫療機構未被領回嘅流產胎，亦會送到永愛堂火化，骨灰會撒喺專用紀念花園。

環境局話感謝葵青區議會、地區人士或機構、葵青民政事務處嘅支持，以及關注團體嘅意見，局方衷心希望有關父母可以釋懷。

更多港聞

【Emily】參觀中大創業日 段崇智玩VR射擊

【明報專訊】中文大學創業日噚日起一連兩日舉行。校長段崇智噚日參觀創業項目互動展示區時，忍唔住戴上VR眼鏡玩一款「射擊電子競技」遊戲。佢喺開幕... 詳情