【Emily】英女王逝世 個別英資行致哀
[2022.09.12] 發表
【明報專訊】英女王伊利沙伯二世逝世，Emily留意到唔少英資公司總部都有致哀，香港分行就未必跟隨。例如，匯豐同渣打銀行嘅行政總裁都有喺LinkedIn哀悼女王過身，身在印度嘅匯控CEO祈耀年仲去咗英國駐新德里大使館簽弔唁冊，英國匯豐facebook轉埋黑頭像。老牌英資大行怡和同太古截至噚日都未特別公開回應。
香港方面，Emily留意到香港總商會喺LinkedIn都有發文，望英女王安息，話會懷念佢。總商會喺帖文中讚揚英女王係優秀嘅楷模，觸動咗全球數以百萬計嘅人嘅生命。不過總商會網頁同facebook就唔見有同樣帖文。
香港駐倫敦經貿辦處長羅莘桉日前都有發文，話同好多英國朋友一樣，對英女王逝世感到傷感，不過其同特首李家超日前聲明一樣，無提到英女王或英國同香港嘅關係。佢讚揚英女王在任忠誠盡責，努力締造和平，形容人類失去咗一個中流砥柱(tower of strength)。
更多港聞
相關新聞
