【Emily】連登遭蘋果下架 網民估估吓 管理團隊:疑有會員留言違政策
【明報專訊】網上平台LIHKG連登嘅應用程式,近日畀用戶發現無法喺蘋果公司應用程式商店(App Store)下載,亦都搜尋唔到呢個App,下架惹起用戶猜想。Emily噚日嘗試喺連登官方網站嘅連結前往App Store亦無法下載,反而喺Google Play就可以照常下載。
籲用戶咪亂信亂傳流言
連登管理團隊喺討論區澄清,唔係佢哋將程式下架,初步懷疑有會員嘅留言違反App Store嘅政策而被下架,又話目前同蘋果公司溝通中,呼籲用戶唔好亂信同亂傳流言。Emily向警方查詢有冇要求App Store將有關應用程式下架,警方話唔評論個別媒體報道。蘋果公司喺截稿前未有回覆。
LIHKG連登喺2016年11月開始運作,睇番資料,當年較熱門嘅討論區係高登,其時坊間有唔少第三方瀏覽程式產生,但高登討論區擔心影響官方頁面瀏覽量,停止授權畀第三方瀏覽程式,有網民就另起爐灶成立連登討論區。連登喺反修例事件中,係其中一個本地熱門討論平台。
應用程式開發商李勁華形容,App Store將應用程式下架唔係罕見,當蘋果嘅政策經常改變,而應用程式未能即時更新軟件,蘋果有可能收到投訴,或者喺內部自我監察嘅時候,將唔符合公司政策嘅應用程式下架。佢舉例遊戲開發商Epic Games曾經繞過蘋果公司嘅支付系統,改用其他方式收費,蘋果基於開發商無遵守公司政策,一度將相關遊戲應用程式下架。