【Emily】民主黨促全民派1.5萬
[2022.02.12] 發表
【明報專訊】疫情蔓延，百業艱難，派錢呼聲一直未停。民主黨噚日公布財政預算案建議，認為政府要對比上一年嘅5000元消費券，加碼到每人派15,000元。黨主席羅健熙話，疫情下唔少市民面對開唔到工、中咗強檢要排大隊，甚至被迫失業，大家都期望政府提供即時財政支援，萬五元就最實際；例牌嘅公屋免租一個月，同綜援出一個月雙糧亦少不免。
民主黨又建議向長者派發最多1萬元醫療券，資助佢哋處理慢性疾病，或者打針前檢查身體係咪適合，可減輕公院負擔。民主黨醫療政策發言人袁海文話，唔係特別要谷長者接種率，只係有見唔少老人家關注，想求個安心，政府起碼有責任幫手；但就算老人家唔打，都應該尊重意願。
民主黨又話，疫情影響打工仔生計，目前政府一筆過提供1萬元嘅失業援助金並唔足夠，認為應該改為每月發放5000元，為期半年。同時，由於政府推動「北部都會區」，民主黨中委吳永輝話應該停止中部水域填海，因為無理由兩個大項目同時推行，勞民傷財喎。
更多港聞
相關新聞
