【Emily】全線停派膠遮袋 領展成第一
[2022.02.05] 發表
【明報專訊】每逢打風落雨嘅日子，街上或商場垃圾桶都會堆滿即棄雨傘膠袋。領展噚日宣布，已喺旗下全線物業，包括75個商場推行「拜拜遮袋」行動，唔再派發雨傘膠袋，並斥資130萬元添置吹地機等設備。領展話，落雨嘅時候，會喺所有正門同人流較多嘅出入口放置吹地機同雨傘除水器(圖)；出入口會鋪地氈並以膠紙固定，避免地面濕滑；仲會要求清潔營辦商增派人手抹地。
2017年開始推行「減少使用/派發雨傘膠袋」審核認證計劃嘅環保組織「綠領行動」，對領展嘅決定表示支持，綠領行動總幹事何漢威同Emily講，計劃推行至今都無集團全線停派膠袋，一般係地產商轄下個別商場自發參加，領展今次喺制度上改變，畀前線職員、市民清晰信息，相信行動更有效，亦向其他公司做到示範。但何漢威相信，領展嘅行動係萬中無一，要其他機構都做到，始終要政府政策轉變。
更多港聞
相關新聞
