【Emily】抽中立會辦公室 管牧：神嘅安排

【明報專訊】新一屆立法會由70人加到90人，立法會大樓要擴建，工程完成前有一半議員辦公室會喺鄰近嘅中信大廈。原來，立法會大樓嘅議員辦公室喺連任議員優先揀選後，仲有4間房可以畀新丁抽籤。立法會秘書處噚日抽籤，結果由選委會界別管浩鳴、陳仲尼、黃國同九龍西候任議員梁文廣中籤。

4房畀新丁 陳仲尼黃國梁文廣亦中

據了解，呢4間房，1間位於6樓，即係同民建聯一層；3間喺8樓，同層有工聯會等。工聯會理事長黃國同Emily講，佢抽中8樓嘅房，同工聯會原有嘅幾個議員一齊，而工聯會另外兩個新議員陳穎欣同梁子穎就要去中信嗰邊開工。

西九新動力梁文廣話佢都係抽中8樓，雖然唔係同西九新動力主席梁美芬同層，但8樓有經民聯吳永嘉，佢哋都好friend。同樣抽中8樓嘅管牧就話鍾意立法會大樓嘅辦公室，因為睇過中信嗰邊係共享辦公室，唔太習慣；佢形容今次中籤係「神嘅安排」。

至於位於6樓嘅房就由民建聯陳仲尼抽中，可以同其他黨友同層。佢話自己係代表民建聯去抽，抽到618室，但具體分配由黨安排。

更多港聞

【Emily】港燈新App 智能電表戶可查用電量

【明報專訊】港燈推出全新流動應用程式「港燈應用程式」（HK Electric App），功能包括當智能電表帳戶用電量達上次帳單周期一個預設百... 詳情