【Emily】票站影相 聶德權話同事拍攝獲授權 網民質疑犯法 曾國衞都有po投票相

公務員事務局長聶德權（圖）噚日刊出喺票站內投票嘅打卡相，被網民質疑違法。聶其後留言回應，話相片由政府獲授權嘅同事拍攝，用意係呼籲宣傳投票。（聶德權facebook圖片）

保安局長鄧炳強（穿西裝者）噚日朝早8點半喺獻主會聖馬善樂小學票站外排隊準備投票。（黃志東攝）

【明報專訊】立法會選舉日，特首林鄭月娥及司局長空群而出，投完票都出新聞稿或喺社交媒體宣傳，而喺票站出打卡相唔少得。做過政制及內地事務局長嘅公務員事務局長聶德權，噚日就喺社交媒體上載一張佢喺票站內投票嘅相，但即刻畀網民圍攻，網民列出法例話，按法例喺票站內影相、錄影等，最高可被罰款5000元及監禁6個月。有網民話犯法就係犯法、問局長點解可以喺票站影到相。

話說聶德權下晝喺facebook出帖提大家投票，出咗張票站內投票相，即被質疑。聶喺留言回應話，相片由政府獲授權嘅同事拍攝，用意係呼籲宣傳投票，多謝大家關注。其實刊出票站內投票相嘅仲有政制及內地事務局長曾國衞，佢朝早喺太古城票站投票，都有出相，但就未見人留言質疑佢違法。曾國衞行程緊密，先後去咗多個港島區票站，仲去視察3個邊境管制站運作。

許正宇寫書法谷票 鄧炳強排隊投票

到黃昏，財政司長陳茂波亦出post，話投票過咗大半日，過程暢順、秩序井然，叫大家快啲出嚟。財經事務及庫務局長許正宇就喺屋企寫書法，話仲有4個鐘選舉結束，拎住「尚有四小時 投票莫遲疑 香港新格局 豈能少了你」墨寶呼籲。

保安局長鄧炳強朝早喺土瓜灣票站外排隊投票，大讚新嘅電子取票系統運作暢順，等咗數分鐘就進入投票站。不過，民主派35+初選案被告、獲准保釋嘅鄒家成喺fb出帖，引述鄧炳強早前話，有孤狼式恐襲風險，鄒話「是你們教我『驚就唔好出街』的」。

更多港聞

【Emily】潘焯鴻話曾鈺成道歉 梁熙團隊：絕無此事

【明報專訊】10個地區直選選區中，港島東係其中一個選情較激烈嘅選區，候選人不時針鋒相對，其中民建聯梁熙及「中科監察」主席潘焯鴻日前仲分別向選... 詳情

【Emily】麥美娟現身助選 葉劉：感動又驚喜

【明報專訊】多名立法會選委會界別候選人噚日為自己拉票之後，馬不停蹄四出為直選嘅友好候選人拉票，好似工聯會麥美娟，除咗幫黨友外，仲走去東涌為出... 詳情

【Emily】梁美芬拖老公投票 管牧再被問佳仔

【明報專訊】立法會選舉選委會界別由1448名選委，從51個候選人中選出40個議員，經民聯梁美芬由地區直選轉跑道出選選委會界別，同時屬法律界當... 詳情

【Emily】接楊森獄中信 黃碧雲憶35年同行爭民主

【明報專訊】民主黨前立法會議員黃碧雲係民主派35+初選案被告之一，月前獲准保釋。佢前晚喺facebook話，收到因反修例遊行同六四集會案而被... 詳情