【Emily】西區遊樂場徵翻新意見 兒童有得say
[2021.08.23] 發表
【明報專訊】士美菲路兒童遊樂場只得兩個搖搖木馬，中西區議員彭家浩上年喺區議會遞交咗文件，要求部門翻新場地，最重要係翻新時需以「地方營造」模式諮詢公眾，將公眾意見融入新設施，文件獲通過。佢喺facebook分享網上問卷收集意見，公眾可以揀想要咩玩樂元素，例如係搖動、滑動、跳躍、攀爬、旋轉等，甚至可以直接提出想要嘅元素。份問卷仲問埋想要咩花種喺遊樂場，包括：巴士野牡丹、紅杜鵑等。
彭家浩喺fb話，遊樂場設有實體問卷同收集箱，康文署同香港規劃師學會都願意一齊宣傳呢個公眾諮詢，了解居民希望有咩新嘅玩樂元素同植物，所以份問卷都設計到適合兒童填寫，有圖畫，務求可得到未來第一身用家嘅意見。
彭家浩話，明白大家未必會到該場地，所以街坊可填寫網上問卷。有網民就留言話想要單槓，又有人話要韆鞦，因為堅尼地城區韆鞦嚴重不足。彭家浩呼籲大家把握呢個難得機會，積極就區內設施提供意見。
更多港聞
相關新聞
