【Emily】籲眾籌助伍家朗買樓 王進洋捱轟道歉
[2021.07.29] 發表
【明報專訊】東京奧運燃點起港人對運動員嘅熱情，「劍神」張家朗贏到金牌後商界不斷送禮。葵青區議會前副主席張文龍就話，相信唔少商家諗緊送車送樓賺名聲，「如果你手上有咁多資源可以送出嚟嘅，可唔可以做多啲更有意思嘅嘢？」佢舉例，如果地產商有地，寧可送少兩層樓，等大家有返啲舒服嘅空間做運動；如果有錢，不如贊助本地體育競技；如果有權，就應該畀真正熟悉體育嘅人主導體育政策、逼政府提供多啲容易使用、達專業要求嘅場地。佢認為與其做一時三刻嘅「公關show」，不如持續支援香港體育發展、令香港不斷造就運動人才。
張文龍：送車送樓 不如撐體壇發展
另一邊廂，香港羽毛球一哥伍家朗噚日喺分組賽鎩羽而歸，離島區議員王進洋一度建議幫家朗眾籌，「當係一番市民嘅心意……我有信心筆錢夠佢買樓」。不過建議就遭批評，元朗前區議員巫啟航話，運動員嘅夢想落空，「唔係用錢或樓去彌補到嘅」；荃灣前區議員謝旻澤斥「完全將運動員嘅努力貶低」。
王進洋極速出道歉聲明，話香港運動員十分需要資源協助，上述帖文係手誤，「令大家誤以為所謂天馬行空嘅眾籌想法，原來係用一層樓黎代替為香港爭光嘅榮耀」，自言無論出發點如何，都應該考慮言論會否好心做壞事。
更多港聞
【Emily】海洋公園覓得新CEO 黃嗣輝9?1接棒
【明報專訊】正尋求轉型嘅海洋公園終於搵到新總裁，政府之前「空降」旅遊事務專員黃智祖由5月1日出任公園CEO，為期約6個月，目標在喺呢段時間搵... 詳情相關新聞
