【Emily】修例提選票不需對摺 謝偉俊：多咗
[2021.05.01] 發表
【明報專訊】建制派謝偉俊近日頻頻喺修改選舉制度嘅立法會法案委員會提問，噚日喺會上就問到，當局預計日後選票尺寸比以往細，所以就喺條例提到唔需要對摺，佢質疑立例有冇需要講得咁細，如果張選票真係摺咗咁又會點，「寫到咁死，點樣摺張票、摺唔摺張票都要講到咁實」，反問係咪做得太多。
政制及內地事務局首席助理秘書長楊樂詩回應話，其實票站都有工作人員幫助選民，將選票合適地放入投票箱。謝偉俊追問如果摺咗張選票係咪有效，楊就話只要投票意向能清晰表達都係有效。
謝偉俊形容自己有感而發，認為條例寫得太細，搞到政府人員處理修例時做得太辛苦。法案委員會主席、建制派「班長」廖長江都話有同感，笑言「不過都唔算寫得太死喇，佢冇指定你用左手或右手投票」。
更多港聞
【Emily】鄒家成獄中畫自嘲熊 Gary畫高達渣古
【明報專訊】民主派初選案36人已還押兩月，勝出新東初選嘅鄒家成，日前由獄中寄出畫作。佢畫咗近日年輕人之間非常流行嘅「自嘲熊（jokebear... 詳情相關新聞
