【Emily】主人唔現身為由 「歎為觀止」 棄養動物無符 田北辰轟政府執法不力
[2021.04.20] 發表
【明報專訊】立法會「研究動物權益相關事宜小組委員會」噚日開會，議題包括修訂《防止殘酷對待動物條例》進展。實政圓桌田北辰多番批評政府執法不力，就連佢當年親自出馬、打去漁護署投訴有人棄養狗狗，對方都話搵唔到主人、都冇辦法，佢好勞氣咁話，原來狗主唔現身就可以「走法律罅」、不了了之，「我真係歎為觀止，原來以前我立過啲咁嘅法例㗎？」
根據《狂犬病條例》，棄養動物係犯法、可判監。田北辰會上重提2018年有隻芝娃娃叫「珍寶珠」，全身癱瘓但被主人棄養喺垃圾房，雖然身上有晶片，但主人唔願意現身，未能麻醉做手術。田北辰憶述，佢當時打電話問漁護署，但對方話搵唔到主人冇辦法，「狗主唔現身就冇辦法？呢啲乜鬼法律嚟㗎？點執法呀？」
漁護署話修例後可加強執法
漁護署高級獸醫師陶文慧解釋，聯絡主人係因為要蒐證、了解遺棄動機。田二少質疑當局「搵唔到就不了了之？」，問當局有冇通緝狗主，或趁其離境時拘捕佢。陶文慧就話，今次修訂條例後，棄養有可能變成公訴罪行，到時可以加強執法，相信阻嚇力會大好多。
田北辰又話，當局2017年提交立法會文件，指過去3年零檢控、零投訴，佢動氣話：「梗係零啦，立法會議員打到去，都冇晒辦法，普通人打去(當局)會睬佢咩？」
更多港聞
【明報專訊】香港大學學生會早前就大學國安教育向校長張翔發公開信，批評校方「斷送院校自主」、「愧對學士先賢」。官媒《人民日報》前晚發表題為「切...
詳情
【明報專訊】中學文憑試（DSE）筆試周五開考，疫情之下，今年設特別安排，如考生考試日正接受強制檢疫，可申請於檢疫中心應考文憑試。考評局昨回覆...
詳情
相關新聞
