【Emily】胡應湘：白海豚如老鼠唔食得 唔會絕種
[2021.03.05] 發表
【明報專訊】團結香港基金噚日舉辦論壇，探討填海問題，出席嘅合和實業主席胡應湘(哥頓)重申支持明日大嶼項目，話香港過去一向以開山填海方式供應土地；對於有人話填海唔環保，佢話自己已85歲，仲生勾勾喺度，話環保係保護人類，唔係用嚟保護白海豚。佢話白海豚唔會絕種，因為白海豚同老鼠一樣，都係唔食得，佢哋又會識得避開填海地點，所以唔使擔心。
話環保係保護人類 唔係保護海豚
哥頓又引述有人話填海會影響某種蜥蜴，話如果填海啲蜥蜴自然會走開，開山仲匿喺度就抵佢死。
香港海豚保育協會唔同意哥頓嘅講法，話過去幾十年香港不斷填海，珠三角水域嘅白海豚族群數量已由2005/06年約1000條，跌至2018/19年600條，稀有程度由近危(低危)轉為易危(受威脅)，反映白海豚受到嘅威脅愈嚟愈大，若繼續推展大型填海工程，數量只會不斷下降，同呢種動物係咪食得完全無關。
發展局長黃偉綸喺開場發言時就話，填海係唯一新增土地來源嘅方法，其他如開發棕地同土地規劃等，只係「左手交右手，總量無增加」。佢又透露明日大嶼填海工程研究正招標，預料今年中可以開展研究工作。
更多港聞
【Emily】百機構獲頒首屆「私隱之友嘉許獎」
【明報專訊】個人資料私隱專員公署噚日舉行「私隱之友嘉許獎2021」頒獎典禮，表揚機構喺保障個人資料私隱方面嘅努力，政制及內地事務局長曾國衞擔... 詳情
【明報專訊】疫情衝擊幼稚園營運，教育局回覆，收到8間幼稚園上學年停辦通知，本學年則有3間，累計11校已或決定停辦。至於下學年參加獲政府資助的...
詳情
相關新聞
