【Emily】民處再拒撥款 議員鬧封殺區會「乜都唔使做」
[2021.01.16] 發表
【明報專訊】民政事務處反對本屆區議會嘅建議唔係新鮮事，公民黨黃大仙區議員劉珈汶(Carmen)噚日話，有4個撥款項目畀民政處發信反對，當局引用區議會撥款守則，話較適宜以其他政府撥款或部門撥款推行嘅活動一般唔會獲得支持。Carmen批評條例成為萬能key，話以後區內滅蟲滅鼠活動就交畀食環署、交通議題研究有運房局、公屋規劃有房屋署，咁樣「區議會乜都唔使再做喇！」
4個被政府拒絕撥款項目包括購買防疫物資、宣傳區議會會議、調查區內電單車泊位需求、研究交通噪音問題。以最後一項交通研究為例，黃大仙民政專員黃智華話研究涉及環境局同環保署嘅政策範疇，基於善用公帑原則，政府唔會支持區議會推行相關計劃。Carmen話根據上述邏輯，日後區議員辦事處都唔可以幫街坊填福利金表格，因不符區議會職能，有關工作應由社署負責，佢批評民政專員幫撥款守則釋法，話政府任擺龍門，正式開始封殺區議會。
更多港聞
相關新聞
