【Emily】跟衫變色 皇后像廣場聖誕樹亮燈
[2019.12.21] 發表
【明報專訊】又到聖誕，唔少人會去搵大型聖誕樹影相打卡，歡度佳節。旅發局今年邀請國際團隊「The Xmas Designers」創作咗一棵18米高聖誕樹，喺中環皇后像廣場展出，噚晚亮燈。呢棵聖誕樹特別之處係用幾何圖形拼砌出嚟，配以LED霓虹燈帶裝飾，市民仲可以行入樹內，令樹身嘅霓虹燈變色𠻹！
偵測入樹參觀者衣服顏色
聖誕樹有4個入口，市民一走近或進入聖誕樹，聖誕樹就偵測到參觀者嘅衣服顏色，樹身霓虹燈帶會隨之變色；樹入面都有濃厚嘅聖誕氣氛，市民喺出面影相後，記得行入樹內，同聖誕老人、聖誕鹿、雪人等節慶裝飾影相呀！
聖誕樹開放亮燈時間由下晝5點至晚上11點，24、25同31日仲亮燈到第二日凌晨1點！旅發局主席彭耀佳話，呢個一反傳統嘅聖誕藝術裝置，外形非常吸睛，呼籲大家趁假期同親朋好友一齊去影相留念。
更多港聞
相關新聞
