【Emily】逾230?間婚禮服務公司 唔做警察生意
[2019.11.09] 發表
【明報專訊】反修例風暴持續，唔少市民不滿警察，超過230間婚禮攝影、化妝、司儀服務公司，聯合發起「罷接警婚」行動，喺聯署聲明話，婚界堅信同擁護法治精神，但鑑於警察行為失控，出現大量濫權、濫暴、濫捕情况，為大眾不能接受，參加行動嘅公司喺良知驅使下，唔能夠喺婚禮上再向警察送上微笑祝福，嚴正聲明喺成立獨立調查委員會前，唔會接受警務人員喜慶節目嘅預約。
想感染其他行業跟隨
發言人Matthew話，想感染其他行業跟隨，做到更大效果，畀壓力政府同警察，佢話知道有室內設計師都搞緊類似行動。
無辦法當無事咁去服務祝福
Matthew話觸發佢哋做呢個聯合行動，係因為過去周末有警察喺室內飲宴，同時間有警察衝入商場執法、喺外面掟催淚彈。佢話呢行嘅特色係為新人度身定做服務，要同新人有良好關係，行家都盡專業令新人有完美婚禮、祝福新人，但現時無辦法當無事咁去祝福。佢話行家唔做警察生意，除咗係政治表態，大家亦再接受唔到扮無事去服務警察。
Matthew話一單婚禮攝影生意，最平1.6萬、最貴可以去到10幾萬，透露有行家嚟緊仲有警察單，有啲會商討退款，有啲會做埋就唔再簽新警察客。
更多港聞
相關新聞
