【Emily】顏寶鈴孟加拉開廠 勸阻福建鄉親來港

【明報專訊】反修例風暴持續，上月北角出現福建幫同示威者毆鬥事件。祖籍福建嘅港區人大顏寶鈴話佢喺孟加拉設廠，上月當地一班福建鄉親搵佢，話要搭飛機嚟香港幫同鄉手，對抗反修例黑衣人，顏寶鈴當堂嚇一跳，立即曉以大義，叫大家冷靜，話如果大家嚟到香港發生衝突，只會令警隊執法更麻煩，成功游說鄉親取消行動。

上月5日反修例罷工集會後，北角發生白衣人襲擊黑衣示威者事件，黑方人多擊退白衣人。其後8月11日港島東遊行，一批福建人由內地到港，喺北角一間酒家集結，警方喺場外戒備，無發生大規模衝突。

顏寶鈴話福建人一向團結，大家會同仇敵愾，遠在孟加拉嘅同鄉知道8月初北角同鄉唔夠人打，即刻走去搵佢，話已經籌咗10萬美元做經費，諗住一齊搭飛機嚟香港，仲話其他國家同鄉都出發去咗香港。顏寶鈴話梗係要勸止，唔想佢哋嚟到香港有不愉快事件發生。

顏寶鈴係「顏寶鈴中學」校監，佢話問過學校，暫無學生罷課，只有20幾個學生去咗拉人鏈，但課堂正常。佢話學校要政治中立，佢成日同學生老師見面，勸學生先讀好書，唔好畀政治活動影響學習環境。