【Emily】港青戰世界技能賽 鬥砌生產線鬥製珠寶

【明報專訊】喺廠房組裝自動化同順利運作嘅生產線，對生產貨品好重要。香港專業教育學院(IVE)學生歐陽家明同楊家豪憑住呢項技能，將代表香港參加「世界技能大賽」，於「機電一體化」項目，同各國選手一較高下。56個比賽項目中，今屆香港代表隊將出戰其中22個，包括美髮、汽車噴漆、印刷媒體技術等，有望為港爭光。

另參加美髮汽車噴漆印刷技術項目

歐陽家明同楊家豪自小對機械工程同維修有濃厚興趣，上年喺選拔賽脫穎而出，接受一年特訓，本月下旬出戰喺俄羅斯喀山舉行嘅「世界技能大賽」。比賽時二人要分工合作，心思縝密嘅家豪編寫電腦程式，身手敏捷嘅家明組裝生產線。佢哋話要盡快完成組裝，爭取更多時間檢測程式。

另一選手陳詠朗，將出戰珠寶製作項目，利用大會提供嘅18K金原材料，喺指定時間內按圖紙製作吊墜或胸針等珠寶工件；同時要根據客戶要求設計作品，唔止考技術，仲考埋設計知識。詠朗現時喺珠寶公司當學徒，佢話公司亦有幫佢特訓，如有模擬比賽場地，又畀佢以氧氣火槍練習。