【Emily】幫輕警察 民記招義工清路障
【明報專訊】港澳辦同中聯辦前日喺深圳舉行座談會,向建制派傳達要「挺特首、挺警隊」等信息,中聯辦主任王志民呼籲佢哋「積極發聲、勇敢行動」,搞活動發揮正氣力量。建制派圈子fb噚日開始轉貼「守護香港大聯盟」搞嘅8月10日「全民撐警日」海報,呼籲市民到警署送慰問信、心意卡,講句「阿sir、madam,辛苦晒」,仲要影張相或拍片上載社交媒體,加埋hashtag「#全民撐警 #守護香港」。
作為第一建制政黨,民建聯亦會搞連串活動,該黨會務顧問、港區人大代表葉國謙同Emily講,民記會考慮成立眾籌基金,資助受影響嘅市民,亦會同街坊去警署送生果等,細節仲籌備緊。民記立法會議員蔣麗芸就話,好多時示威者會喺區內整路障,佢哋會喺各區搵居民做義工,喺唔產生衝突下清理路障,希望幫輕警察。
另外,噚日喺成都舉行嘅世界警察和消防員運動會舉行開幕禮,當地媒體《四川觀察》報道當香港代表隊步入會場時,看台發出震耳欲聾歡呼聲,話全場觀眾站立向香港警察同消防致敬。