保民生抗修例大聯盟 長輩圖反修例：請轉發給你摯愛嘅親友
[2019.06.15] 發表
【明報專訊】「長輩圖」大家平時收唔少，近日修訂《逃犯條例》風波如火如荼，創意無限嘅網民將宣傳對象指向中老年人，模仿建制用語，用「長輩圖」反對修例。
街上專揀中老年人派
話說有網民喺facebook開咗「保民生抗修例大聯盟」專頁，話明「不搞政治、只做實事」，話修例會導致樓市、股市大跌，所以要反對修例。佢哋嘅網上宣傳設計，好似撐修例嘅「保公義撐修例大聯盟」，唔小心睇好易搞錯，專頁直至噚日截稿時，已有逾1.3萬人讚好。
Emily噚晚行過太子，仲見到有兩個人開街站嗌咪，易拉架貼住要「保民生，反修例」。派單張嘅市民同Emily講，因為見到網上有長輩圖，所以印咗幾百張派發，會專揀中老年人派咁話。
睇番兩人派嘅單張，都係嚟自網上嘅「長輩圖」，用字模仿建制派常用嘅「外國勢力」論調，話修例係有「外部勢力」推波助瀾，話特首林鄭月娥丈夫、兒子都係英國籍，又話修例係為推動社會矛盾、破壞社會和諧穩定。
網上流傳嘅「長輩圖」仲話，修例會導致樓價大跌，又強調絕不能效法西方國家設立逃犯引渡條例，最終當然要加一句「請轉發給你摯愛嘅?(親)友」。
更多港聞
相關新聞
