葉劉淑儀：特首就唔畀我選啫，區議員都唔畀選？

新民黨主席葉劉淑儀有意年底披甲區選，對於有人批評佢年紀大等，佢反問「特首就唔畀我選啫，區議員都唔畀我選？」其後澄清當日係自己退出選特首。圖為2017年3月，葉太（前中）宣布因提名不足退出特首選舉，競選辦成員向她送上「有選未為輸」紙牌。（資料圖片）

【明報專訊】新民黨主席葉劉淑儀有意年底披甲區選，爭取明年出戰「超級區議會」嘅入場券，但落腳邊區懸而未決。葉太噚日喺電台節目話，原則係唔會去友黨嘅區，會選擇新區或者本身屬新民黨嘅區。對於有聲音批評佢年紀大等，68歲嘅葉太反問「特首就唔畀我選啫，區議員都唔畀我選？搞錯呀，香港仲係咪自由社會？」佢其後澄清當日係自己退出選特首，又話「唔好講啲咁高深嘅問題」。

其後澄清當日係自己退選特首

葉太噚日喺商台《政好星期天》話，有人擔心佢出選會影響後生仔，但佢就認為自己仲做得嘢，又舉例美國國會議員就算到80幾歲都未退休，「點解我要讓畀個可能未必學我做到咁多嘢嘅後生？」

葉太重申希望帶新人入立法會，為跟咗自己咁耐嘅年輕人盡啲力，建制派亦唔會只得一兩個黨獨大，「咁樣唔健康，多啲競爭好」。佢透露新民黨年底區選將派40人參選，主要喺新東、新西同香港島。

政府早前接納土地供應專責小組報告，收回32公頃粉嶺高球場建屋，本身係香港哥爾夫球會會員嘅葉太批評，「有啲政黨好離譜囉，平時斬一棵樹都大吵大鬧，點解要收番個場，影響好多古樹、古蹟同蝴蝶」。佢又話舊政府總部西座「蓉蓉爛爛」、好普通，啲政黨就要保育，百幾年歷史、國際稱譽嘅球場就要摧毁，「呢啲雙重標準真係唔明白」。

更多港聞

講人生講香港 土炮動畫免費睇

【明報專訊】唔少本土動畫作品都好出色，動畫靚之餘故事亦有深意，不過年輕人要投身呢個行業亦需要支援，香港數碼娛樂協會主辦、創意香港贊助嘅動畫支... 詳情

譚sir無電子錢包 上海無人店空手回

【明報專訊】全國兩會下月舉行，全國人大常委譚耀宗今日啟程上京準備。譚sir噚日出席青年民建聯大灣區座談會時，透露自己無內地電子錢包，笑言曾向... 詳情

渠務署長榮休 難忘為歷史建築刨書

【明報專訊】渠務署長唐嘉鴻榮休，上周五同傳媒茶敘，分享37年公務員生涯。署長話咁多年參與咁多工程，最深刻係施工期20年嘅淨化海港計劃，呢個歷... 詳情

唐英年法總領事動土 西九葡萄園啟動

【明報專訊】西九文化區前日舉行葡萄種植儀式，出名好紅酒嘅文化區管理局主席唐英年，同酒莊莊主及法國駐港總領事齊齊「動土」，象徵「葡萄園計劃」啟... 詳情

龍友注意 下月花展大紅花做主角

【明報專訊】一年一度嘅香港花卉展覽吸引唔少攝影發燒友同愛花者入場，今年展覽喺3月15至24日舉行，為期10日，朝9晚9開放。今年花展主題為「... 詳情