星洲組屋工人房 阿涂話大過佢間房
[2019.02.04] 發表
【明報專訊】旺角行人專用區早前被「殺街」，令街頭表演備受關注，油尖旺區議會早前去新加坡外訪時都乘機「取經」。公民黨區議員余德寶就同Emily講，當地嘅街頭表演者除咗要考牌，仲要上堂學習守則，先能夠喺特定地方表演，如果無牌表演分分鐘要坐監。
油尖旺區會星洲考察規管街頭表演
新加坡現時有304名持牌街頭表演者，納入規管嘅表演項目包括音樂表現、扭氣球、扮蠟像等。當地註冊要先提交申請、上堂學習守則，然後由當地藝術界人士評審，通過後先能夠持牌表演，表演者亦都要將牌照放喺當眼地方，以資識別。
表演者要考牌 過藝術界評審
當地表演亦規矩多多，例如只能表演到晚上10點半、音量唔可以超出65分貝，表演者亦唔能夠賣嘢；每個表演者亦只得5個指定地方表演，包括捷運站、熟食中心、公園等。余德寶覺得咁樣可以起到分流作用，香港可以仿效，不過佢就話當地並冇「大媽」問題。
除咗參考街頭表演制度，外訪團仲有參觀新加坡著名嘅「組屋」，余德寶仲笑住話，民主黨涂謹申一見到當地組屋嘅工人房，忍唔住話仲大過佢間房，原來一個三人家庭住嘅組屋已經有800、900呎；如果係「三代同堂」，分分鐘有複式單位住𠻹呀。
更多港聞
【明報專訊】全國政協常委唐英年噚日透過微博同大家拜早年，一開始已大讚「豬是象徵聰明丶活潑和福氣的動物」。唐唐亦同大家分享好消息，透露「唐家亦...
詳情
相關新聞
