多仔公陳家洛3個女都?獎學金

陳家洛（中）一對孖女身穿藍白色套裝裙出席頒獎禮，佢哋話事前無夾過，估唔到出嚟效果唔錯。頒獎嘅教育局長楊潤雄亦有喺社交網站上載同佢?嘅合照。（魏綺婷攝）

【明報專訊】香港卓越獎學金計劃噚日舉行頒獎禮，拎得獎學金嘅個個都係叻仔叻女，Emily見到公民黨陳家洛都現身政府總部嘅會場內，原來佢嚟捧愛女場。佢一對孖女今年喺英基學校協會嘅學校畢業，齊齊喺國際預科文憑(IB)攞到43分(滿分45)，仲一齊拎到獎學金去外國。大孖靜琳會去法國時裝藝術高級學院攻讀時裝設計及創作，細孖靜彤就會去倫敦大學金匠學院讀傳媒及傳訊文學士。

女兒笑稱「唔想行爸爸條路」

陳家洛同波蘭籍太太育有4個女及細仔，仲記得二女陳綽寧當年係IB 45分狀元，2016亦獲卓越獎學金，喺英國布里斯托大學讀緊戲劇同英文，嚟緊升三年級。囡囡們多才多藝，佢哋都忍不住講笑，話無人想行爸爸從政條路，「Dad, no one wants to follow your path!」

家洛3個女先後?到獎學金，而佢個大女已畢業，現於波蘭投資銀行做分析員。家洛話一直都畀囡囡主導揀想讀嘅科，放手畀佢哋去，不過送走晒啲女去外國，都好唔捨得㗎，好彩仲有6歲嘅細仔陪吓。計計埋埋，佢3個女都拎咗卓越學生獎學金，讀大學完全唔使畀學費，都真係慳唔少！