林鄭司局長紀律部隊首長 齊赴結業禮 軍事營學員﹕想加入警隊

林鄭司局長紀律部隊首長齊赴結業禮軍事營學員﹕想加入警隊

[2018.07.30] 發表

【明報專訊】點樣運用暑假，學生各有想法，一班中學生就選擇花15日參加青少年軍事夏令營，到軍營體驗解放軍生活，噚日就喺佢哋嘅結業禮。烈日當空下，一班學員滿頭大汗咁步操同表演岳家拳，展示訓練成果，有幾個仲話將來想加入紀律部隊！

第14屆香港青少年軍事夏令營由解放軍駐港部隊、特區政府同香港群力資源中心主辦，來自138間中學嘅300名學生需完成15日嘅訓練。今屆亦首設初中體驗營，畀200名中一、中二學生都可以體驗5日訓練。

特首鼓勵﹕

畢業後入紀律部隊

噚日喺新圍軍營舉行嘅結業禮，特首林鄭月娥、政務司長張建宗、全國政協副主席董建華、中聯辦主任王志民等人都有出席。林太致辭時提到青年工作係本屆政府重要施政之一，所以3名司長、幾名局長及5名紀律部隊嘅首長都有嚟支持活動，以鼓勵同吸引同學「畢業後加入香港政府的紀律部隊」。林太亦話「一帶一路」、粵港澳大灣區等國家發展政策為香港帶來唔少機遇，鼓勵同學盡早裝備自己，貢獻香港、國家同世界。

升中五嘅學員梁瀟月認為夏令營嘅講座好有意義、「唔係洗腦」，又話「見到中國發展真係好發達、迅速」。

話講座有意義

學員﹕唔係洗腦

兩名參與5天體驗營嘅初中學員，包括升中二嘅吳晟韜同升中三嘅林琪騏，都話將來想加入警隊。吳晟韜話係因為「警察係維持社會治安嘅部隊」，好欣賞紀律部隊規律同團結，仲話會繼續參與15日嘅軍事夏令營𠻹。