運署新App蝦碌 時代廣場當上環 英倫風路牌 網民讚親切

運署新App蝦碌時代廣場當上環英倫風路牌網民讚親切

[2018.07.25] 發表

【明報專訊】運輸署上周?尖沙嘴5個地方設立試驗性「行人地圖導向標示板」，顯示5至15分鐘路程內嘅步行範圍資料，鼓勵市民走多兩步，唔少去過英國嘅網民都覺得似曾相識，感覺指示牌風格同倫敦所用嘅十分相似，講笑話係「歸英第一步」；英國倫敦交通局就喺facebook專頁發帖，證實有份參與相關設計；運輸署噚日就推出新交通應用程式「香港出行易」，結合提供搭車、揸車同步行路線嘅資訊。

facebook專頁「道路研究社」日前發現黑襯黃嘅運輸署「行人地圖導向標示板」令人「彷彿返?倫敦咁」，仲令唔少居英嘅朋友感到非常親切，有網民笑指運輸署「反了反了」、「好唔愛國囉」。

除咗用英倫風指示牌鼓勵市民多行幾步，運輸署亦推出「香港出行易」App，結合以前3個應用程式，包括「香港乘車易」、「交通快訊」同「香港行車易」，當中提供銅鑼灣同尖沙嘴區步行路線，亦包括「行人地圖導向標示板」所提供嘅資訊，計劃未來兩三年擴展至其他地區。

呢個App同時提供公共交通、駕車同步行路線，亦有220個停車場實時泊位尚餘數量，又有沿途交通快拍，就亦會提供視障人士同行動不便人士所行路線。不過，Emily就發現App內部分資料唔多準確，點選銅鑼灣時代廣場嘅泊車資訊，點知文字顯示出嚟係「灣仔區林士街1號」(林士街其實係喺上環)。

九巴同城巴新巴嘅App已陸續提供巴士實時到站時間，運輸署呢個App就只提供電車同大嶼山巴士嘅資訊，運輸署總工程師羅慶新透露，正同其他公共交通公司洽談，期望將來可以一站式提供所有公共交通到站資訊，但因涉及私有產權而需時處理。