服役17年 曾走入風眼 捷流41定翼機 啟德永久展覽

服役17年曾走入風眼捷流41定翼機啟德永久展覽

[2018.07.16] 發表

【明報專訊】曾為飛行服務隊服務17年嘅捷流41型定翼機，由赤鱲角移至啟德跑道公園作永久展覽，市民可近距離參觀。呢架飛機服務時任務多多，包括搜救、拍攝、協助執法、收集天氣數據等，當年由英國引入，有份去英國接收飛機、駕駛佢返香港嘅高級定翼機機師梁敏超，就曾喺機上受訓17年，同飛機有深厚感情，政府新聞網亦訪問佢，講講有咩深刻事。

呢架定翼機喺2009年時同天文台合作，喺機上安裝探測器，於機場一帶上空收集氣象數據，提高風切變、湍流預警嘅準確度。遇有熱帶氣旋靠近香港，佢就會飛入熱帶氣旋範圍，收集風力、風向、濕度、氣壓等數據，2011年颱風「海馬」逼近時，捷流41首次追風。梁敏超話當年駕駛定翼機飛入風眼，形容飛向颱風時，起初四周好平靜，進入雲層就感到震盪，仲聽到雨點打喺擋風玻璃嘅巨響，離開雲層，一切又恢復平靜，咁樣反覆十幾分鐘，「一切戛然而止，相信我們已駛進風眼，見到藍天和太陽，非常奇妙」。

飛行服務隊倡保留獲接納

飛機退役難免會被拆售，總飛機工程師余力臻當年萌生保留飛機作展覽嘅念頭，飛行服務隊總監陳志培喺偶然機會下向時任政務司長林鄭月娥反映保留定翼機嘅構思，獲正面回應。飛機已送到啟德跑道公園，展覽場地會有二維碼，方便市民上網睇到更多資訊。