【明報專訊】台灣樂隊「五月天」今日起喺香港迪士尼樂園停車場舉行6場演唱會，Emily上網睇過，發現唔少黃牛飛炒價已經大幅回落，仲有飛係平過正價四成，原價880元門票，494元就買到，至於最平嘅原價680元門票，最平450元起有交易。另外，買咗飛嘅觀眾到時除咗可以搭港鐵到迪士尼，大會亦安排咗7條入場巴士線，同6條離場線來往市區同迪士尼。 Emily噚日下晝上過交易平台「StubHub」、「Viagogo」，同埋社交網站Instagram睇過，仲有唔少門票出售，5月13日尾場、原價880元C區門票，最低以494元放售，較原價平最少40%。至於680元企位門票，亦低見450元。上月被炒高12倍嘅原價1180元門票價格亦大跌，尾場門票最便宜1679元有交易。 場內最多可以容納2萬人，大會就話，觀眾入場前都要接受保安檢查，唔可以帶任何金屬或玻璃容器、摺椅、自拍棍等，表演雖然喺晚上7點15分開始，但觀眾下晝5點開始就可以入場喇。
|
| |
| |
;)
