【明報專訊】有「股壇長毛」之稱嘅獨立股評人David Webb噚日喺網站發表文章，撐另一個「長毛」——立法會前議員梁國雄。Webb喺文中討論長毛「護髮案」敗訴一事，事緣長毛因為2011年衝擊立法會遞補機制論壇案被判囚4周，服刑期間佢嘅招牌長髮被剪短，佢提司法覆核挑戰懲教署工作守則獲裁定勝訴；署方不服提出上訴，日前上訴庭判署方勝訴。

上訴庭話傳統社會嘅外觀標準，男人通常短髮，而女人啲頭髮就有長有短，署方嘅規定無論對男或女囚犯，冇造成較不利對待，所以呢個規定冇性別歧視。Webb批評，咁即係話留長髮對男人嚟講就係唔合適同不雅，而女人就唔係。佢提醒大家，喺法官面前記得剪短頭髮，質疑法官會唔會因為梁國雄留有長頭髮，所以對佢有偏見。佢又話，事實上社會冇要求或強制嘅外觀標準要我哋遵從，普通法裏面有「作出有違公德的行為」，但留長髮冇違反。

法官戴長假髮源於17世紀禮儀

Webb最後話，大家唔知道法官係蓄長髮定短髮，因為佢哋都戴住長假髮，而呢個假髮就正正係17世紀英王查理二世時，一個禮儀社會必要嘅裝束。