教協45歲 林鄭答應赴會慶 馮偉華唔怕被話「行埋一齊」
[2018.04.30] 發表
【明報專訊】香港教育專業人員協會已踏入45周年，為隆重其事，教協話大事慶祝，5月19日辦大型酒會及展覽，特首林鄭月娥仲答應出席。會長馮偉華話教協唔算缺錢，屆時唔會籌款，所以林太唔使擔心。今次係首次有特首出席教協會慶，算係突破，馮偉華就話唔怕畀人話教協同政府「行埋一齊」，話林太去教協活動、了解多啲教育界睇法係好事。
首次有特首出席
馮偉華話，以往佢哋每5年搞一次大型慶祝會，通常喺教協會所搞，但今年想搞大少少，為方便保安及管理，租用紅磡葛量洪校友會黃埔學校禮堂辦酒會，等多啲朋友可以參加。馮偉華同Emily講，教協已故領導司徒華曾經係呢間學校嘅校監，同教協有淵源，喺學校搞教育界活動比去酒店場地搞更有意義，且慳錢平實啲。
以往教協會慶主要請局長出席，但上次40周年例外，當時唔請局長，因為認為局長唔得掂；今次45周年，佢哋約兩個月前向林太發邀請。馮偉華話，林太未上任已同教協等團體傾教育撥款，而林太亦顯示肯就教育議題同教協商討，唔似上任特首做法。馮認為教協同林太都有善意，認為林太出席活動係認同教協嘅代表性，去教協活動亦可令佢了解多啲教育界看法。除咗酒會，教協近期都搞咗唔少「蛇齋餅糉」活動，包括早排辦蛇宴，仲有唔少康樂活動及優惠。
更多港聞
相關新聞
