【明報專訊】中學文憑試(DSE)中國歷史科上周四(19日)已考完，但事後有話題。有人質疑其中一條問及民國初年軍閥割據嘅題目配相出錯，事關張相係袁世凱去天壇「祭天」時所攝，但試題圖片說明就話係「袁世凱稱帝」。考評局就解畫，話袁世凱祭天都係稱帝嘅活動，照片標題符合史實。 張相出現喺DSE中史科卷一必答題第6題嘅資料二，叫學生分析民國初年軍閥割據嘅背景。張相拍下袁世凱1916年正式恢復帝制前，喺1915年12月去天壇祭天嘅情景，而袁世凱其人其事係中國近代史必學課題，相信唔少學生都會對呢張相有印象。但考評局以「袁世凱稱帝」形容有關相片，畀網民質疑用錯資料相，有網民甚至話「若學生知道此圖之真像(象)(祭天)，那學生怎能分析同軍閥割據的關係？若學生不知真相而認定是稱帝圖，反而可以正確作答」。 考評局：符合史實不影響作答 考評局就話，歷史著作同埋畫冊講袁世凱稱帝活動時多用呢張圖片佐證，而袁世凱祭天係其稱帝活動嘅講法，亦見諸一眾教科書，符合考生一般認知。局方話照片標題符合史實，考生作答唔會受影響。 資深中史科教師陳志華就話，除咗張相之外，條題目都出得唔好，因試題內不論袁世凱張相定係其他人物相片，有冇提供其實都冇分別，「唔使睇張相都答到(民國初年軍閥割據背景)，都唔係考學生利用資料相答題」。
|
| |
| |
;){kind=small}
;)
