浸大學生會斷莊 投訴有人阻投票

噚日係補選最後投票日，有男同學（圖）企喺補選票站出面叫同學唔好投票，話候選內閣有政黨背景。浸大學生會候選內閣「漣翊」候選幹事長黃雅文話因為有人阻止投票，會申請選舉呈請重選。（黃雅文提供）

【明報專訊】今年大學學生會出缺莊斷莊情况嚴重，8間資助大學入面，已經有4間斷莊，浸大噚日係補選最後一日投票，最後得9.4%投票率，唔夠規定嘅10%，即係又多一間大學斷莊。

今次得一個叫「漣翊」嘅內閣參與，話說噚日投票嘅時候，有個男同學企咗喺補選票站出面叫人唔好投票，浸大學學生會編輯委員會facebook就話，呢個男同學向其他人話候選內閣有政黨背景，而個政黨曾經追打過本土派，如果學生繼續投票，內閣就有可能當選。「漣翊」成員都有影低當時情况，片段入面見到當有同學打算入去補選票站，企喺門口嘅男同學就同個學生講嘢；候選幹事長黃雅文同Emily講，個男同學想阻止人投票。

齋sir籲投票 學生批評濫權

有人阻止，有教師就發電郵呼籲學生投票，但畀一啲學生批評佢涉嫌濫用職權催票。人稱齋sir嘅浸大宗教及哲學系高級講師陳士齊前日凌晨傳送電郵畀佢任教嘅兩班學生，呼籲學生投票，「幫忙新一屆學生會順利上莊」。齋sir同Emily講有自由咁做，因為佢唔想斷莊，會變咗無學生代表發聲，佢又話自己無要脅人，唔覺有問題，而浸大對事件就回覆﹕「尊重學生會舉行選舉和相關安排的自主權，相信學生會會適當處理。」

更多港聞

陳茂波民望急跌 袁國強重新執業

【明報專訊】中大亞太研究所噚日公布3月份特區政府民望，上月發表《財政預算案》嘅財政司長陳茂波，平均評分為44.5分，較2月份時下跌5.1分，... 詳情

「田生style」橫額 促收回高球場

【明報專訊】粉嶺高球場係咪用嚟建屋解決房屋問題，至今仍然有爭論，社民連副主席周諾恆（右）同成員陳文威（左）噚日就去到粉嶺高球場外掛「田生st... 詳情