撰《精武門》《獨臂刀》 倪匡寫劇本唔會改

撰《精武門》《獨臂刀》倪匡寫劇本唔會改

[2018.03.16] 發表

【明報專訊】著名小說作家倪匡(圖)，亦係傑出電影編劇，出自佢手嘅作品如《精武門》、《獨臂刀》等膾炙人口，爸爸媽媽輩一定睇過。香港電影編劇家協會今年將榮譽大獎頒畀倪匡，會長莊澄早前親身向倪匡伉儷頒獎，大家更對談講咗唔少鮮為人知嘅往事。倪匡謙虛話只識寫文學劇本，唔識寫電影劇本，亦因一落筆就盡全力，所以唔喜歡修改，由此建立咗佢有別編劇同業、只寫一稿嘅獨特習慣。

倪匡獲電影編劇協會榮譽大獎

香港電影編劇家協會噚晚舉行春茗，除咗倪匡獲榮譽大獎外，協會亦選出《相愛相親》(張艾嘉、游曉穎)及《明月幾時有》(何冀平)為2017年度推薦劇本獎。

打過李小龍：鐵板嚟

倪匡備受書迷喜愛，原來唔少佢筆下主角名字，都係佢信手拈來，好似《精武門》嘅陳真，就係揀最普通嘅姓同名，至於大家耳熟能詳嘅衛斯理，倪匡透露佢某日經過大坑，見到衛斯理村，「我覺得那是由鬼佬名翻譯過來，我寫啲洋裏洋氣小說，幾啱用喎」。至於佢自己嘅筆名倪匡，亦改得十分隨意，「匡字就係翻辭海翻出來，一翻開手指一點，就是匡字，好在唔係屁字，唔係都幾大鑊。」

倪匡喺對談透露，佢仲打過一代武術巨星李小龍。原來李小龍參演嘅《精武門》、《唐山大兄》，亦係倪匡編劇。李小龍回流香港後，積極物色寫手編寫劇本，倪匡話一次飯局中，李捉住佢滔滔不絕，將心中一個華僑漂洋過海去開石礦嘅故事，巨細無遺咁描述，連主角細節都無錯過，然後邀請倪執筆，但佢認為李小龍自己都講晒成個劇本出來，拒絕為對方寫，結果令李小龍大感不滿，表現得十分暴躁，令在席嘅嘉禾電影創辦人之一何冠昌都好擔心，為怕李小龍出手，高叫「倪匡玻璃嚟、唔郁得」，李無奈下反叫倪匡打佢三拳，倪同太太李果珍亦真係出手，倪回憶當時感覺：「佢真係鐵板嚟」。