【明報專訊】兩會期間，喺京城開會嘅全國政協副主席、前特首梁振英(CY)好積極更新facebook，大讚內地制度好處，佢噚日又喺fb撰文，提到列席人大會議期間，議程之一係審議《監察法》草案。CY話反腐敗工作同廉政建設係全國人民最關心嘅大事，讚內地起草《監察法》，顯示國家對呢個問題嘅重視。

CY引述咗全國人大副委員長李建國對《監察法》草案嘅說明，介紹咗草案分成9章，包括準則、監察機關及其職責、監察範圍和管轄、監察權限、監察程序等，一共69條，又話草案會實現對所有行使公權力嘅公職人員監察全覆蓋。CY最後不忘溫提關心國家廉政建設嘅香港朋友，值得細讀呢69條同埋李建國嘅說明。大概過咗3個鐘CY又有新帖文，講解國務院機構改革方案，仲話自己2012年當選後都提出過政府架構改組，所以對呢個議題都有啲認識。