【明報專訊】立法會補選明日投票，工聯會立法會議員陸頌雄噚日喺facebook上載2016年立法會換屆大選後，民主黨劉慧卿喺一個電台節目中，盛讚當時落敗嘅鄧家彪「言論有內涵」嘅短片。陸頌雄話，如果兩年前卿姐夠膽講多兩句公道話，相信會有更多人支持阿彪，唔會有眼不識阿彪喎。

卿姐舊訪問讚阿彪

卿姐舊訪問新東補選鄧家彪喺2016年立法會換屆大選落敗，佢事後喺DBC數碼電台一個節目接受卿姐訪問。當時有個主持讚阿彪實幹，卿姐和議話阿彪喺議會內嘅發言，係工聯會咁多議員中「最有內涵」。卿姐話即使唔同意阿彪嘅立場，都覺得佢做足功課。陸頌雄趁投票前拎返𠵱段舊片出嚟，叫大家支持阿彪。

范國威答錯立會開大會時間

另一邊廂，商台走訪各區搵唔同候選人嚟個「大問答」，考佢哋基本嘅議員知識。被問到立法會大會一般喺星期三幾點開始，做過一屆立法會議員嘅新民主同盟范國威就答錯，佢答朝早9點開始，但其實大會一般喺星期三上晝11點開始。唔知范國威係咪太耐無做立法會議員，所以連開會時間都唔記得？

聽日投票嘅補選，新東可以話係敗部復活戰，最終係鄧家彪定係范國威可以重返議會，大家拭目以待喇。新東補選其他候選人包括同樣做過議員嘅黃成智、屢敗屢戰嘅方國珊、受主感召嘅趙佩玉，以及「網絡紅人」陳玉娥。