林鄭同非建制WhatsApp 專業議政議員笑認有份
[2018.02.22] 發表
【明報專訊】專業議政其中4名議員郭榮鏗、葉建源、邵家臻及梁繼昌，噚日舉行新春傳媒茶敘，無黨派醫學界陳沛然都有現身團拜活動，唔通佢加入咗專業議政？陳醫生向Emily解釋，自己其實係「搭單」出席，並非加入專業議政，過去都試過搭單出席民主派記者會咁話。佢承認專業議政向佢招過手，不過自己都係較鍾意無黨派。
特首林鄭月娥早前透露經常用WhatsApp同幾名非建制議員溝通，郭榮鏗噚日笑住話「肯定專業議政有份」，不過在座嘅無，叫記者「唔喺度嗰啲(缺席嘅莫乃光同李國麟)，自己去問」。各人各有新年願望，郭榮鏗希望堅守香港法治，邵家臻叫政府唔好喺福利上吝嗇，梁繼昌促請政府將盈餘用得其所，葉建源盼小三TSA(BCA)「有好消息」，陳沛然就祝大家身心康泰。
更多港聞
相關新聞
