【明報專訊】政府嘅土地供應專責小組之前話填海造地可以考慮，香港明天更好基金執行委員會主席陳啟宗噚日同傳媒茶敘時又提到，預期今年樓市平穩發展，但冇地嘅話樓價只會急升，除咗填海，佢再提用1％至2%郊野公園嚟建屋。 好多人都反對打郊野公園主意，陳啟宗就話，以前香港嘅「後花園」喺新界，但未來「成個大灣區都係我哋嘅後花園」；佢又幫手推銷高鐵，話將來高鐵通車，約1個鐘就可以去到大灣區好多地方。對於喺邊度填海，陳啟宗都有睇法，維港係香港最大嘅天然資源，唔可以填，但九龍東、西可以考慮。 至於月尾發表嘅財政預算案，陳啟宗話對於係咪要減利得稅至15%冇意見；咁財政司長應唔應該做「守財奴」？陳啟宗話派錢「戇居」，應為香港長遠競爭力投資，佢又批評立法會議員政治掛帥，唔理經濟，阻住政府撥款項目通過喎。
|
| |
| |
;)
