【明報專訊】選舉時候選人都會出盡其謀去爭取支持，過去選舉亦曾出現有候選人表達意見時忍唔住喊嘅場面，而噚日港台舉辦九龍西選舉論壇，呢一幕亦突然上演。

九龍西補選候選人、報稱獨立嘅前民建聯成員蔡東洲，噚日同對手姚松炎同民建聯鄭泳舜較勁，有聽眾問3人房屋議題，蔡東洲搶先發言，提到自己喺觀塘區劏房住咗14年，突然失聲痛哭，講完「高官啲樓應該拎出嚟畀人住」跟住就講唔到落去，用紙巾抹乾眼淚。而主持亦隨即請其他候選人先發言。

睇見呢個場面，鄭泳舜話自己服務九龍西多年，好明白蔡東洲嘅感受，強調房屋問題係重中之重，而劏房戶水深火熱，佢希望政府思考點樣增加土地供應，包括發展郊野公園邊陲、填海同舊區重建等，亦要求政府喺財政預算案向輪候公屋3年以上嘅劏房戶派發租金補貼。

姚松炎就提出短、中、長期解決方案，包括利用空置校舍幫助劏房戶、加快公屋興建，同利用部分高爾夫球場土地興建公屋等。