「可能有啲老師未拍過拖」 劉國勳怕教師唔識性教育

劉國勳

【明報專訊】立法會教育事務委員會噚日開會討論校園性騷擾同性教育，建制同民主派議員都認為教育局推動性教育嘅工作需要改善。民建聯立法會議員劉國勳(圖)就擔心，學校嘅教師未必識教，「可能有啲老師未拍過拖，無經驗，咁佢又點去教呢？」佢又話學生唔係接觸唔到資訊，係接觸得太多，梳理唔到正確資訊，佢建議教育局搵專家製作啲生活化嘅教材，甚至應去搵「懂得教嘅團體」入學校教授性知識，減輕教師壓力。

民建聯主席李慧琼亦認同黨友觀點，佢認為有指引唔代表教師識教，仲話自己細嗰有睇教育電視，提議製作YouTube網上影片同教育電視，由幼稚園至中學製作唔同系列嘅影片，「最好就將啲個案好似《警訊》咁，將社會發生嘅事話畀小朋友聽」。

人民力量陳志全就批評，1997年制定嘅性教育指引，將「變性」同偷窺、易服癖、露體一齊列作異常性行為，質疑標籤變性做唔好嘅嘢，建議收番指引。教育局副局長蔡若蓮回應話，因為份指引「歷史上係一份文件嚟」，已經存在，所以唔會刪除，又話2000年起已經將性教育融入常識科等學科同學校活動。

更多港聞

泛民促查阻區議員開會 黃國健激動：關你嘟事

【明報專訊】香港眾志周庭被選舉主任、東區民政事務專員鄧如欣DQ參加補選資格，周庭星期二到鄧原本會出席嘅東區區議會會議旁聽，佢連同多個民主派區... 詳情

中大文物館「戊戌說狗」賀新歲

【明報專訊】就快到農曆新年，香港中文大學文物館舉辦咗「戊戌說狗」展覽同大家迎狗年賀新歲。今次展覽展出一系列嘅狗類文物，包括戰國時期到現代嘅1... 詳情

九西選舉論壇 蔡東洲憶住劏房14年泣不成聲

【明報專訊】選舉時候選人都會出盡其謀去爭取支持，過去選舉亦曾出現有候選人表達意見時忍唔住喊嘅場面，而噚日港台舉辦九龍西選舉論壇，呢一幕亦突然... 詳情