【明報專訊】沙田車公廟向來香火鼎盛，尤其係年初三，唔少香港人都會趁赤口去上香求籤，祈求轉個好運。農曆新年就到，為咗向遊客推廣呢種地道文化，旅發局今年搵嚟兩個外國小朋友越洋求籤，借助視訊通話，仲安排解籤佬解籤。

來自東京、9歲嘅白井紡生志願係做野生動物攝影師，佢求到第86籤，幫手解籤嘅汪道靈居士話，籤文提到「石田為業喜非常」意指艱苦，目標唔係一下子可以實現；至於住喺悉尼嘅8歲小朋友Lucas就求到第42籤，佢夢想係將來登上月球參觀，汪居士話籤文中「前者披星帶月來」，即係有機會咁解！Emily雖然唔可以未卜先知，但都祝佢哋夢想成真。

另外，狗年將至，旅發局仲搵咗「汪星人」著賀年衫影相賣萌，上載去官方facebook，希望多啲遊客認識農曆新年文化！