【明報專訊】梁振英前日出席「國家與香港」研討會時，話大部分港人好愛國，仲特登留意參加者嘅名，發現唔少人名中「有『國』有『華』」，反映好多港人內心都有對國家和民族復興嘅冀盼。以梁振英嘅講法，數一數64名立法會議員當中，有8人都「愛國」，包括：工聯會黃國健、「體育、演藝、文化及出版界」馬逢國、金融服務界張華峰、工程界盧偉國、紡織界鍾國斌、區議會(一)劉國勳、民建聯張國鈞、衛生服務界李國麟。 黃國健同Emily講，大部分人個名都係父母改嘅，而佢嘅父母輩對國家感情深厚，期望佢成為「國家健將」，巧合地佢又真係愛國分子。 睇睇行政會議成員，唔計係雙料議員嘅黃國健同張國鈞，亦有5人嘅名「有國有華」，包括：港大校委會主席李國章、民建聯葉國謙、律政司長袁國強、民政事務局長劉江華、商務及經濟發展局長邱騰華。不過有網民就問，梁振英名字「無國無華」但有「英」，咁又點理解呢？
|
| |
| |
;)
