【明報專訊】噚日係「雙十節」，即係中華民國國慶，今年亦係辛亥革命106周年。最近加入埋民建聯、有「雙牌頭」嘅工聯會鄧家彪前晚出席咗九龍巴士職工總會龍運巴士職工分會活動，而該活動原來係「慶祝第106周年辛亥革命 雙十節聯歡宴會」。 阿彪前晚仲喺自己facebook專頁上載咗活動嘅相，相中所見佢企喺一塊印有國父孫中山肖像、青天白日滿地紅旗嘅布景板前同人合照。佢並留言話：「慶祝辛亥革命106周年！」 稱活動在10月9日 非慶雙十 不過，呢張相一出就引來網民留言，話佢「身在曹營心在漢」、慶祝台灣「國慶」。噚日Emily問過阿彪擔唔擔心畀人話佢政治不正確，阿彪就話自己係勞顧會嘅勞方委員，佢只係獲邀出席活動，趁機同打工仔交流一下。佢特別提醒前日係10月9日，佢唔係去慶祝雙十節。 佢強調自己唔會同台獨同港獨嘅人做朋友。不過，呢張合照噚晚就喺鄧家彪個facebook上面消失咗，佢夜晚上載咗另一張相，唔知係咪補鑊，新相片係佢出席一個慶祝中華人民共和國成立68周年嘅國慶活動，佢仲喺台上激昂振臂。 新民主同盟鍾錦麟同民主動力趙家賢等人，就喺自己fb嘅個人頭像相片度加咗個「雙十國慶 中華民國生日快樂」嘅框框。鍾錦麟話佢哋唔係揶揄鄧家彪，而係覺得呢個日子值得紀念，希望引起「反威權」嘅反思。
|
| |
| |
;){kind=small}
;)
