【明報專訊】食物及衛生局長陳肇始(Sophia)係今屆政府唯一一名女局長，亦罕有由非醫生領導食衛局工作，本身係護士嘅Sophia原來出身醫護世家，佢接受馬會公共事務部新一期出版嘅《駿步人生》訪問時透露，佢媽媽係醫生，年幼時屋企常見聽筒等醫療工具，所以對醫護工作唔陌生；中學畢業後Sophia去英國讀兒科護理課程，佢話當時好多嘢唔識，連做家務都覺得陌生，但去到外國就要獨立處理日常生活問題，所以Sophia都呼籲年輕人有機會就放開眼界向外闖吓。 對於外界有擔心佢難以駕馭眾醫生團體，Sophia 就唔擔心，佢話係咪專業出身唔係最重要，最重要係有視野，可以同其他專業合作，認真了解不同持份者嘅需要同有適切溝通。至於作為唯一女局長，Sophia話唔覺得工作上有咩優勢或吃虧之處，認為無論喺政策討論定游說工作，本住「是其是、非其非」態度，男女局長都唔會有分別。 做局長公務繁忙，Sophia話𠵱家只能間中行山或者去健身房做運動，飲食方面佢話自己食蔬果，但唔食生嘢，同時唔怕食煎炸嘢。
|
| |
| |
;)
