【明報專訊】強積金管理局不時教吓打工仔點樣管理強積金同理財，但資訊未必容易吸收，近日佢哋就喺facebook專頁「全積特攻」推出一系列潮語卡，用大家都會講嘅潮語，講解退休策略大道理、強積金投資嘅知識。噚日fb有第一張潮語卡，寫住「因為好重要，所以講三次」呢句網民成日用嘅句子，原來想帶出投資3個元素，包括時間、本金同回報率，解釋3個元素會影響投資成效。

呢批潮語卡一共有12張，配以知名網絡插畫師Hello Wong設計嘅插畫，由9月中到12月先後推出，嚟緊仲有嘅潮語包括「又要威又要戴頭盔」、「嚇死人咩﹗個心離一離呀﹗」、「娘娘收兵」等。呢啲潮語似乎同投資無乜關係，但好似「娘娘收兵」咁，積金局就話娘娘廣收觀音兵，就好似分散投資嘅原理，有異曲同工之妙，解釋將唔同投資分散喺唔同種類產品，就可以減低投資風險，保障回報。