【明報專訊】一直喺香港無置業嘅特首林鄭月娥，自從今年初辭任政務司長後，一直租住灣仔嘅服務式公寓，即使梁振英卸任特首後，禮賓府都要翻新一下，所以林太未有立即搬入去。上任咗兩個月，林太噚日就喺facebook透露，原來佢上個月底已經搬咗入禮賓府住喇。 禮賓府除咗係特首同家人住嘅地方，亦不時用嚟招呼外賓，林太喺fb話早幾日喺禮賓府第一次舉行大型活動，招待百幾個加入咗18區青年網絡嘅後生仔女，同佢哋傾吓偈。由相片可見，除咗林太外，副民政事務局長陳積志，以及同林太有幾分似樣嘅特首辦常任秘書長丁葉燕薇亦都喺度，唔知班年輕人分唔分到林太同丁太呢？ 林太話當日交流氣氛熱烈，大家踴躍就青年嘅「三業三政」(學業、事業、置業；議政、論政、參政)發言，期待未來同年輕人有更多交流機會。 另外，林太噚日喺特首辦同國家首席大法官、最高人民法院院長周強會面，佢歡迎周強來港出席「第四屆海峽兩岸暨香港澳門司法高層論壇」，又感謝一直以來對兩地司法協助工作，以及香港作為亞太區國際法律及爭議解決服務中心嘅支持。
|
| |
| |
;){kind=small}
;)
