中西區建制兩議員或任副局政助 一議席料落泛民手中
[2017.07.27] 發表
【明報專訊】政府仲未公布新一屆嘅副局長同政治助理委任名單，不過部分人選已經曝光，其中民建聯中西區區議員蕭嘉怡將會擔任政治助理，據了解原本係民政事務局長劉江華搵佢入去嘅，但近日最新變化係佢將會轉做政務司長張建宗嘅政助；至於自由黨中西區區議員陳浩濂亦極可能加入政府，擔任財經事務及庫務局副局長。兩人入政府嘅話都要辭去區議員議席，引發補選，建制陣營就預料蕭嘉怡一席有可能輸，落番泛民手上。
Emily聽聞劉江華搵蕭嘉怡入去後，政府高層就建議，一個政策局最好唔好有兩個民記成員喇，所以最新發展係佢將轉任張建宗嘅政助，而於上屆擔任勞福局政助嘅黎穎瑜，則會轉做民政事務局嘅政治助理。Emily聽聞，副局、政助委任至少分兩批公布，預料由上屆政府過渡嘅好快就會公布，但新加入政府嘅因為牽涉品格審查等程序，相信8月未必返到工喇。
蕭嘉怡同陳浩濂入政府將要辭去區議員，Emily聽聞，陳浩濂所屬嘅山頂區，選民背景以至經歷過佔領運動後，相信只要接棒者夠勤力，要保住議席比較容易；但蕭嘉怡個議席，幾個了解區情嘅建制中人都話好難搞，指蕭嘉怡喺地區好勤力，但2015年選舉只係贏300幾票，反映泛民有穩定基本盤，恐怕蕭嘉怡入政府後辭職，呢個議席都會保唔住喇。
更多港聞
以色列國會 議員蹤影一mon睇晒 莫乃光﹕建制都覺得香港做到
【明報專訊】立法會工商事務委員會喺以色列考察，其中一個參觀點唔少得議會。香港立法會不時有俗稱「狗仔隊」嘅政務官，喺立法會數住啲議員去咗邊，每... 詳情
【明報專訊】民建聯噚日公布新一輪「消費者信心指數」調查結果，今年錄得自2008年3月以來嘅最高水平，當中3項指數都回升，民建聯話，結果反映近...
詳情
相關新聞
