訪以色列 鍾國斌問暴亂喺邊

立法會休會，工商事務委員會就組團到以色列考察，噚日同當地外交部午餐交流。今次泛民、建制都有代表參與。（鍾國斌facebook圖片）

【明報專訊】立法會工商事務委員會正喺以色列職務訪問，睇吓當地創新科技等，近日因為以色列喺耶路撒冷聖殿山實施新保安措施，爆發以巴衝突，不過似乎無礙班議員去考察，唔少人都擺相上facebook交代睇咗乜嘢及報平安。自由黨黨魁鍾國斌就話，報道睇到喺耶路撒冷舊城有衝突，但佢哋前日一早去到，由酒店行去舊城需要15分鐘，而佢一個人行咗個半鐘，都見唔到一個警察，仲問：「究竟暴亂地方喺邊呢？」

鍾國斌噚日另一個post就上載交流相片，佢話以色列科技咁勁，好大原因係初創企業做得好，佢話其中主因係當地人18歲要當兵，當兵時已經接觸最先進科技，所以當完兵就創業，30歲前已經成功。佢直言呢個獨特情况都幾難學到。

另一有份考察嘅議員馬逢國就喺fb上載相片，包括同以色列外交部人員午餐，以及參觀聖城最後晚餐所在地、猶太教誦經室等。

兩地科技合作 楊岳橋批零進度

公民黨楊岳橋就話，到訪當地嘅科技機構「Israel Innovation Authority」，當地人員話早喺2014年頭，以色列已經同港府簽署合作備忘，鼓勵兩地機構合作，但「三年過去，進度是：零，一樣嘢都冇做過——除了握手、影相」。楊岳橋就話，政府成立咗創科局超過一年半，咁做過啲咩去跟進呢？